ကလေးငယ်များတွင် Down Syndrome (Mongolism) ဒေါင်းလက္ခဏာစုဟု ခေါ်တွင်သော မွေးရာပါ ချို့ယွင်းမှုတစ်မျိုး တွေ့ရတတ်သည်။ ဤလက္ခဏာစုမှာ ခရိုမိုဆုန်း Chromosome အရေအတွက် မှားယွင်းမှု ကြောင့် ဖြစ်ရခြင်းဖြစ်သည်။ လူတစ်ယောက်၌ ခရိုမိုဆုန်း ၄၆ ခု သို့မဟုတ် ၂၃ စုံ ပါဝင်သည်။ ရိုးရိုးသာမန် ခရိုမိုဆုန်း ၄၄ ခုနှင့် လိင်ခရိုမိုဆုန်း ၂ ခု တို့ဖြစ်သည်။ ခရိုမိုဆုန်းများကို အမှတ်စဉ် တပ်ပေးထားသည်။ ဒေါင်းလက္ခဏာစုတွင် ခရိုမိုဆုန်းနံပါတ် ၂၁ ၌ တစ်စုံ (နှစ်ခု) ရှိရမည့်အစား၊ တစ်ခုပိုကာ ခရိုမိုဆုန်း ၃ ခု ပါရှိနေကြောင်းတွေ့ရသည်။ ကလပ်စည်းများ ပွားများရာ၌ ခရိုမိုဆုန်းများ ကွဲထွက်ရာတွင် ချို့ယွင်းချက် ကြောင့် တစ်ဖက်သို့ ခရိုမိုဆုန်းတစ်ခု အပိုပါသွားခြင်းဖြစ်သည်။ အသက် ၄၀ ကျော်အမျိုးသမီးများ၏မမျိုးဥတွင်ထိုသို့ ဖြစ်တတ်သည်။ သုတေသနပညာရှင်တချို့က ဒေါင်းလက္ခဏာစုမှာမိခင်များကြောင့်သာမဟုတ်ပဲ၊ဖခင်များကြောင့်လည်း ဖြစ်နိုင်သည်ဟုဆိုသည်။ ဒေါင်းလက္ခဏာစုရှိသောကလေးငယ်များသည်ဉာဏ်ရည်နိမ့်ကျနေလေ့ရှိသည်။
ဒေါင်းလက္ခဏာစု၌ အောက်ပါသွင်ပြင်လက္ခဏာများ တွေ့ရနိုင်ပါသည်။
– ဦးခေါင်းအရွယ်အစား သေးငယ်ခြင်း
– မျက်စိသည် ဘေးဘက်သို့ မြင့်တက်နေသကဲ့သို့ တွေ့မြင်ရခြင်း
-လက်ဖဝါးကျယ်ကားနေခြင်း
-လက်သန်းအနည်းငယ်ကွေးနေခြင်း
-ဒုတိယနှင့်တတိယခြေချောင်းလေးကြားနေရာကျယ်ခြင်း
– အဆစ်များပျော့ခွေခြင်း – နားရွက်အရွယ်အစားသေးငယ်ခြင်း
-ပါးစပ်ဟစိဟစိဖြစ်နေခြင်း၊ပွင့်နေခြင်း
-ပါးနီမြန်းနေခြင်း
-သွားများမညီညာခြင်း
-လျှာအရွယ်အစားကြီးနေခြင်း
– အာခေါင်မိုး မြင့်နေခြင်း
– မွေးရာပါနှလုံးရောဂါ၊ သွေးကင်ဆာရောဂါများရှိနေတတ်ခြင်း ဒေါင်းလက္ခဏာစု ကလေးငယ်များသည် စာသင်ကြားရန်အခက်အခဲရှိနေတတ်သည်။ သို့သော် ကျွမ်းကျင်မှုပိုင်းဆိုင်ရာ ပညာများသင်ကြားပေးပါက တတ်မြောက်နိုင်ကြသည်။တချို့သောကလေးငယ်များ မွေးရာပါချို့ယွင်းချက်များကြောင့်ငယ်ရွယ်စဉ်အခါမှာပင် သေဆုံးသွားခဲ့ကြသည်။ တချို့နိုင်ငံများတွင် ကိုယ်ဝန်ဆောင်အမျိုးသမီးများအား ကိုယ်ဝန် ၁၄ ပတ်အချိန်၌သန္ဓေသားဝန်းကျင်မှ ရေမွှာရည်ကိုရယူပြီး၊ဗီဇစစ်ဆေးခြင်းများ ပြုလုပ်လေ့ရှိသည်။ ဒေါင်းလက္ခဏာစုတွေ့ရပါက၊ကိုယ်ဝန်ကိုပျက်အောင် ပြုလုပ်ပေးတတ်ကြသည်။ ဒေါင်းလက္ခဏာစုဟုအမည်ခေါ်တွင်ရခြင်းမှာ ၁၈၂၈ ခုနှစ်တွင် မွေးဖွားခဲ့သော သမားတော်ကြီး Dr. John Langdon Down အား ဂုဏ်ပြုခေါ်ဆိုထားခြင်းဖြစ်သည်။အဆိုပါလက္ခဏာစုကိုယင်းသမားတော်ကြီးကစတင်ဖော်ထုတ်တင်ပြပေးခဲ့သည်။ ဒေါင်းလက္ခဏာစု၏သွင်ပြင်လက္ခဏာများသည် ရှေးမွန်ဂိုလစ်ဇင်Mongolismဟုလည်း ခေါ်ဆိုတတ်ကြသည်။ ဒေါင်းကလေးများသည်မည်သို့သောသွင်ပြင်လက္ခဏာရှိနေပါစေ၊ဉာဏ်ရည်နိမ့်ကျမှုရှိနေပါစေ သူတို့အား မြင်တွေ့သူတိုင်းက ချစ်ခင်ကြင်နာကြသည်။ ဒေါင်းလက္ခဏာစုကလေးငယ်များသည် ကံမကြောင်း၍ဉာဏ်ရည်နိမ့်ကျနေကြသော်လည်း၊မျက်နှာမြင်ချစ်ခင်ပါစေဟူသောဆုတောင်းပြည့်ကြသည်ဟု စာရေးသူ အနေဖြင့် ယုံကြည်လက်ခံမိပါသည်။
Author – ဒေါက်တာအေးကျော် (ဇီဝကမ္မဗေဒ)