OnDoctor
The Greatest Gift

အမျိုးသမီးများ၏ လိင်ဆက်ဆံမှုပြဿနာများ

အမျိုးသမီး ၁၀ယောက်တွင် ၄ယောက်၌ လိင်ဆက်ဆံမှုဆိုင်ရာ ပြဿနာများ၊ ၎င်းတို့၏ ဘဝဖြတ်သန်း မှုတွင် ကြုံတွေ့ရလျက်ရှိကြောင်း သုတေသန လေ့လာမှုအရ သိရှိရသည်။ ပြဿနာသည် အချိန်ကာလကြာမြင့် လာလျှင်ဖြစ်စေ၊ မကြာခဏ အကြိမ်ကြိမ် ဖြစ်လာလျှင်ဖြစ်စေ၊ လျစ်လျှူရှုထား၍ မဖြစ်သင့်တော့ပေ။ ထိထိ ရောက်ရောက် ကာကွယ်ကုသမှုများ လုပ်ဆောင်ရန် လိုအပ်မည်ဖြစ်၏။

လိင်ဆက်ဆံမှု ပြဿနာများသည် အကြောင်းအရင်း ဇစ်မြစ်များစွာကြောင့် ပေါ်ပေါက်လာနိုင်သည်။ ယင်းပြဿနာများကြောင့်လည်း လက္ခဏာအမျိုးမျိုးဖြင့် မြင်တွေ့ရနိုင်သည်။ ကံအားလျော်စွာပင် ပြဿနာများ အားလုံးနီးပါးကို ကုသပေးနိုင်မည်ဖြစ်သည်။ လူတို့၏ ခန္ဓာဗေဒတည်ဆောက်ပုံကို နားလည်ထားသင့်သည်။ သဘာဝတုံ့ပြန်မှုများကိုလည်း ဗဟုသုတရှိထားသင့်သည်။ လိင်ဆက်ဆံရာတွင် ပျော်ရွှင်ကျေနပ်မှုရရှိရန် တုံ့ပြန် မှုအဆင့်ဆင့်နှင့် လိုအပ်ချက်အဆင့်ဆင့်ကိုလည်း သိနားလည်ထားဖို့လိုအပ်မည်ဖြစ်၏။

အမျိုးသမီးများ၏ လိင်ပိုင်းဆိုင်ရာ ပြဿနာများမှာ အသက်အရွယ်မရွေး ကြုံတွေ့ရတတ်သည်။ အထူး သဖြင့် ဟော်မုန်းများ ပြောင်းလဲမှုဖြစ်စဉ် ကာလ၌ ပို၍ဖြစ်ပွားလေ့ရှိသည်။ ဥပမာ-ကိုယ်ဝန်ဆောင်စဉ်၊ မီးယပ် သွေးဆုံးစဉ်ကာလမျိုး ဖြစ်သည်။ ထို့အပြင် နာတာရှည်ရောဂါဝေဒနာများ ခံစားနေရချိန်၌လည်း လိင်ပိုင်းဆိုင်ရာ
ပြဿနာများ ပူးတွဲဖြစ်ပေါ်လေ့ရှိပါသည်။

-- Advertisement --

လိင်ဆက်ဆံမှုဆိုင်ရာ ပြဿနာများ ရှိလာပြီဆိုခြင်းကို အောက်ဖော်ပြပါ လက္ခဏာများဖြင့် သိရှိနိုင်မည် ဖြစ်သည်။

  • လိင်ဆက်ဆံလိုသော ဆန္ဒနည်းခြင်း သို့မဟုတ် မရှိခြင်း
  • လိင်ဆက်ဆံစဉ် တက်ကြွမှုအဆင့်ကို ထိန်းသိမ်းနိုင်မှု မရှိခြင်း
  • ဆန္ဒရှိသော်ငြားလည်း တက်ကြွမှု မဖြစ်လာခြင်း
  • ဆန္ဒပြည့်ဝပြီးမြောက်မှု မရနိုင်ခြင်း
  • ဆက်ဆံစဉ် နာကျင်မှုဝေဒနာများ ခံစားရခြင်း။

လိင်ဆက်ဆံမှုဆိုင်ရာ ပြဿနာများသည် အကြောင်းအရာ ဇစ်မြစ်များစွာကြောင့် ဖြစ်ပေါ်လာနိုင်သည်။ အဖြစ်များသော အကြောင်းဇစ်မြစ်တချို့ကို ဖော်ပြပေးထားပါသည်။

ရုပ်ပိုင်းဆိုင်ရာ အကြောင်းအရင်းဇစ်မြစ်များ

ရုပ်ပိုင်းဆိုင်ရာ ယိုယွင်းမှုများကြောင့် လိင်ဆက်ဆံမှု၌ ပြဿနာများ ဖြစ်လာနိုင်သည်။ ဥပမာ-အဆစ် ရောင်ရောဂါ၊ ဆီးနှင့်အစာလမ်းကြောင်း ရေဂါဝေဒနာများ၊ ဆီးခုံတွင် ခွဲစိတ်မှုများ၊ မောပန်းနွမ်းနယ်မှု၊ ခေါင်း ကိုက်ဝေဒနာ၊ အခြားသော နာကျင်မှုဝေဒနာများ၊ ဦးနှောက်နှင့် အာရုံကြောဆိုင်ရာ ရောဂါများ စသည်တို့သည် လိင်ဆက်ဆံမှုဆိုင်ရာ ပြဿနာများ ပေါ်ပေါက်လာစေနိုင်သည်။

တချို့ဆေးဝါးများသည်လည်း လိင်ဆက်ဆံမှုပြဿနာများ ကြုံတွေ့စေနိုင်သည်။ စိတ်ကျဝေဒနာကု ဆေးများ၊ သွေးကျဆေးများ၊ ဟစ်တမင်းဆန့်ကျင်ဆေးများ၊ ကင်ဆာရောဂါကုဆေးဝါးများသည် လိင်ဆန္ဒကို လျော့နည်းစေရုံသာမက ဆန္ဒပြီးမြောက်မှုကိုလည်း အဟန့်အတားဖြစ်စေသည်။

ဟော်မုန်းဆိုင်ရာ အကြောင်းအရင်းဇစ်မြစ်များ

မီးယပ်သွေးဆုံးခါနီးကာလ၌ အီစထရိုဂျင် ထုတ်လုပ်မှုကျဆင်းခြင်းကြောင့် လိင်ဆက်ဆံမှုဆိုင်ရာ ပြဿနာများ ကြုံတွေ့ရနိုင်သည်။ လိင်အင်္ဂါများတွင် အီစထရိုဂျင် ဟော်မုန်းကျဆင်းမှု၏ အကျိုးဆက်ကြောင့် ပြောင်းလဲမှုများ ဖြစ်ပေါ်လာကာ ဆက်ဆံမှုအတွက် အခက်အခဲ ကြုံတွေ့စေသည်။ အင်္ဂါနှုတ်ခမ်းသားများ သေးသိမ်လာသဖြင့် အင်္ဂါစေ့ပေါ်လွင်ထင်ရှားလာသလို ဖြစ်လာသည်။ အာရုံခံစားမှုကို ပြောင်းလဲခြင်း သို့မ ဟုတ် လျော့နည်းညံ့ဖျင်းစေသည်။ သားမွေးလမ်းကြောင်းသည်လည်း ခြောက်သွေ့လာခြင်းနှင့် ကျုံ့လာခြင်းတို့ ဖြစ်လာသည်။ ဆက်ဆံရာတွင် နာကျင်မှုဝေဒနာ ဖြစ်စေသည်။ ဆန္ဒပြည့်ဝရန် အချိန်ပိုကြာတတ်သည်။ ချောမွေ့ ဆီသုံးရန် လိုအပ်တတ်ပါသည်။ သားသမီးမွေးဖွားစဉ် ကိုယ်ဝန်ဆောင် နို့တိုက်ကျွေးမွေးစဉ်ကာလများ၌လည်း ဟော်မုန်းပြောင်းလဲမှုများ ရှိနိုင်ပြီး ဆက်ဆံမှုပြဿနာများ ဖြစ်လေ့ရှိသည်။

စိတ်နှင့်လူမှုရေးဆိုင်ရာ အကြောင်းအရင်းဇစ်မြစ်များ

ပူပင်သောကဝေဒနာများနှင့် စိတ်ကျဝေဒနာတို့ကို ထိထိရောက်ရောက် ကုသမှုမပြုလျှင် လိင်ဆက်ဆံ မှုဆိုင်ရာ ပြဿနာများ ကြုံတွေ့ရလေ့ရှိသည်။ ကာလကြာရှည်စွာ စိတ်ဖိစီးမှုခံရလျှင်လည်း လိင်ဆက်ဆံမှု ပြဿနာများ ဖြစ်ပေါ်လာနိုင်သည်။ လိင်ဆက်ဆံဖော်နှင့် လူမှုဆက်ဆံရေး အဆင်မပြေမှုကြောင့် လိင်ဆက်ဆံ မှု၌ပါ အခက်အခဲပြဿနာများ ဆက်လက်ဖြစ်ပေါ်လာနိုင်သည်။ ယဉ်ကျေးမှု၊ ယုံကြည်ကိုးကွယ်မှု၊ အခြားစီးပွား ရေး၊ လူမှုရေးဆိုင်ရာ ပြဿနာများသည်လည်း လိင်ဆက်ဆံမှု ပြဿနာအဖြစ် ပြောင်းလဲရောက်ရှိသွားတတ်ပါ သည်။

စိတ်ပိုင်းဆိုင်ရာ ပြဿနာများသည် လိင်ဆက်ဆံမှုပြဿနာဖြစ်စေသကဲ့သို့၊ လိင်ဆက်ဆံမှုပြဿနာ များကြောင့် စိတ်ဝေဒနာများ ခံစားရစေနိုင်သည်။ အပြန်အလှန် ဆက်နွယ်ပတ်သက်မှုရှိကြောင်း သတိပြုသင့် သည်။

လိင်ဆက်ဆံမှု ပြဿနာများသည် သင်၏ လူမှုဆက်ဆံရေးကို ထိခိုက်လာလျှင် စိတ်၏ငြိမ်ချမ်းမှုကို အ နှောင့်အယှက်ဖြစ်လာလျှင်ဖြစ်စေ၊ ဆေးပညာရှင်ထံ သွားရောက်ပြသဖို့ လိုအပ်မည်ဖြစ်သည်။ လိင်ဆက်ဆံမှု ပြဿနာများကို ဆေးပညာရှင်ထံ တင်ပြရန်ရှက်ရွံ့ခြင်း၊ ဝန်လေးနေခြင်းနှင့် အားနာနေခြင်းတို့ မရှိသင့်ပေ။ ဆေးပညာရှင် ဆရာဝန်များက ဇစ်မြစ်ကို ရှာဖွေဖော်ထုတ်ပြီး ကုသမှုပေးကြမည်ဖြစ်သည်။ လိုအပ်သော ရာဇ ဝင်မေးမြန်းမှုနှင့် စမ်းသပ်စစ်ဆေးမှု ပြုလုပ်ခြင်းဖြင့် ရောဂါအမည် (ကြောင်းရင်းဇစ်မြစ်) ကိုဖော်ထုတ်နိုင်ပြီး၊ ထိ ရောက်သော ကုသမှုကို ဆောင်ရွက်နိုင်မှာ ဖြစ်ပါသည်။ လိုအပ်ပါက ဆရာဝန်အနေဖြင့် နှစ်သိမ့်ဆွေးနွေးပညာ ပေးသူ သို့မဟုတ် လိင်ဆိုင်ရာကထုံးပညာရှင်ထံ ထပ်ဆင့်ပေးပို့နိုင်ပါသည်။

အမျိုးသမီးများတွင် ဖြစ်ပွားမှု အများဆုံးလိင်ပိုင်းဆိုင်ရာ ပြဿနာများမှာ –

(၁) လိင်ဆန္ဒလျော့နည်းခြင်း၊ ဆက်ဆံလိုစိတ်မရှိခြင်း
(၂) လိင်စိတ်နိုးကြွနိုင်မှုမရှိခြင်း
(၃) ဆန္ဒပြီးမြောက် ပြည့်ဝမှုမရနိုင်ခြင်းနှင့်
(၄) လိင်ဆက်ဆံစဉ် နာကျင်မှုဝေဒနာတို့ ဖြစ်သည်။

လိင်ဆက်ဆံမှုအပေါ် တုံ့ပြန်ခြင်းမှာ အကြောင်းချင်းရာ များစွာပေါင်းစပ်ထားသော ရှုပ်ထွေးလှသည့် အပြန်အလှန် တုံ့ပြန်မှုဖြစ်စဉ်၊ ဇီဝကမ္မဖြစ်စဉ်၊ စိတ်အခြေအနေ၊ အတွေ့အကြုံ၊ ယုံကြည်မှု၊ လူနေမှုပုံစံနှင့် လူမှု ဆက်ဆံရေးစသည့် အကြောင်းချင်းရာများစွာနှင့် ဆက်နွယ်မှုရှိသည်။ ဖော်ပြပါ အကြောင်းချင်းရာများအနက် တစ်စုံတစ်ခု ယိုယွင်းလျှင်ပင် လိင်ဆက်ဆံမှု ပြဿနာများ ဖြစ်ပေါ်လာနိုင်သည်။

လိင်ဆက်ဆံမှု ပြဿနာများအပေါ် ကုသရာ၌ ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ကုသမှုနှစ်မျိုးစလုံး လိုအပ်မည်ဖြစ်သည်။ အီစထရိုဂျင်ပါသော သားမွေးလမ်းကြောင်းအတွက် ခရိမ်အသုံးပြုခြင်း၊ စိတ်ကျဆေးဝါး ကိုတစ်မျိုးမှ အခြားတစ်မျိုးပြောင်းလဲပေးခြင်းတို့ လိုနိုင်သကဲ့သို့၊ ကျန်တစ်ဖက်တွင်လည်း အပြုအမူဆိုင်ရာ ကုထုံးနှင့် အခြားစိတ်ပိုင်းဆိုင်ရာကုထုံးများလည်း တစ်ပြိုင်နက် ဆောင်ရွက်တတ်ကြရသည်။

လိင်ဆက်ဆံမှုဆိုင်ရာ ပြဿနာများအတွက် စိတ်ပိုင်းဆိုင်ရာ ကုထုံးမှာအရေးကြီးပြီး၊ တစ်ခါတစ်ရံ ပထ မဦးစားပေးအဖြစ် ဆောင်ရွက်ရသည်။ ထိုသို့ ဆောင်ရွက်ရာတွင် ကုထုံးပညာရှင်များသည် အောက်ဖော်ပြပါအ ချက်များလုပ်ဆောင်ရန် အကြံပေးလမ်းညွှန်ထားပါသည်။

(က) ပြောပါ၊ နားထောင်ပါ။

တချို့သော စုံတွဲများသည် လိင်ကိစ္စနှင့် ပတ်သက်၍ ဆွေးနွေးပြောဆိုမှု မရှိတတ်ကြပေ။ အမှန်စင်စစ် ပြောဖို့လိုပါသည်။ နားထောင်တတ်ဖို့လည်း လိုအပ်ပါသည်။ ကြိုက်နှစ်သက်မှုနှင့် မကြိုက်နှစ်သက်မှုတို့ကို အပြန်အလှန် ပွင့်ပွင့်လင်းလင်း ပြောဆိုဆွေးနွေးရန် ဖြစ်ပါသည်။

(ခ) ကျန်းမားရေးနှင့် ညီညွတ်သောနေထိုင်စားသောက်မှုပုံစံကို ရယူပါ။

လိင်ပြဿနာဖြေရှင်းရာတွင် ကျန်းမာရေးညီညွတ်သော နေထိုင်မှုပုံစံ ရယူရန်အရေးကြီးပါသည်။ အရက်အလွန်အကျွံ မသောက်သင့်ပါ။ ဆေးလိပ်ဖြတ်ရပါမည်။ ကိုယ်လက်လှုပ်ရှား လေ့ကျင့်ခန်းများ လုပ် ဆောင်သင့်ပါသည်။
ဆေးလိပ်သောက်ခြင်းသည် လိင်အင်္ဂါများသို့ သွေးစီးဆင်းမှုကို လျော့နည်းစေသဖြင့် ဆန္ဒတက်ကြွမှု နှင့် ဆန္ဒပြည့်ဝမှုတို့ကို အနှောင့်အယှက် အဟန့်အတားဖြစ်စေပါသည်။ ကိုယ်လက်လှုပ်ရှား လေ့ကျင့်ခန်းပြုလုပ် ခြင်းသည် အမောလုံစေပါသည်။ စိတ်ပျော်ရွှင်အောင် နေထိုင်ပြီးဖိစီးမှု နည်းနိုင်သမျှနည်းအောင် နေထိုင်ရန် လည်း လိုအပ်မည်ဖြစ်ပါသည်။

(ဂ) ဆီးခုံတွင်း ကြွက်သားများသန်စွမ်းပါစေ။

ဆီးခုံတွင်း ကြွက်သားများ သန်စွမ်းလာစေရန် Palvic Floor Exercise များလုပ်ဆောင်ပေးရပါမည်။ ဆန္ဒတက်ကြွမှုနှင့် ဆန္ဒပြည့်ဝမှုတို့အတွက် အခက်အခဲ ကြုံတွေ့ရပါက ဆီးခုံတွင်းကြွက်သားများ သန်စွမ်းလာ စေရန် လေ့ကျင့်ခန်းများ လုပ်ဆောင်ပေးပါက အကူအညီများစွာဖြစ်ထွန်းနိုင်စေပါသည်။ “Kegel Exercise” ခေါ် Pelvic Floor Exercise လုပ်သင့်သည်။

(ဃ) နှစ်သိမ့်ဆွေးနွေး ပညာပေးသူ Counselor နှင့်တွေ့ဆုံဆွေးနွေးပါ။

ဤအချက်သည် အရေးကြီးဆုံးဟုဆိုက မှားမည်မဟုတ်ပေ။ နှစ်သိမ့်ဆွေးနွေးပညာပေးသူများက လိင် ဆက်ဆံမှုပြဿနာများကို ကူညီဖြေရှင်းပေးနိုင်ကြပါသည်။

လိင်ဆက်ဆံမှု ပြဿနာများကို ဆေးဝါးဆိုင်ရာ ကုထုံးနည်းများဖြင့်လည်း ကူညီကုသပေးနိုင်မည်ဖြစ် သည်။ ဆေးဝါးဆိုင်ရာ ကုထုံးနည်းများတွင်—

  • လိင်ဆက်ဆံမှုနှင့် ပတ်သက်၍ ဘေးထွက်ဆိုးကျိုးဖြစ်နိုင်သော ဆေးများကို ရှောင်ကြဉ်ခြင်း၊ အခြား ဆေးဝါးများ နှင့်ဖလှယ်ပေးခြင်း
  • သိုင်းရွိုက်ဂလင်း ပြဿနာနှင့် အခြားဟော်မုန်းဆိုင်ရာ ပြဿနာများကို ဖြေရှင်းကုသခြင်း
  • စိတ်ကျဝေဒနာနှင့် စိတ်ပူပင်သောက ဝေဒနာများထိထိရောက်ရောက် ကုသခြင်း
  • နာကျင်မှုဝေဒနာ သက်သာစေရန် ဆရာဝန်များက ညွှန်ကြားမှုကို လိုက်နာဆောင်ရွက်ခြင်း စသည်တို့ ပါဝင်သည်။ လိင်ဆက်ဆံမှု ပြဿနာများကို ဟော်မုန်းကုထုံးများဖြင့်လည်း ကုသပေးနိုင်ပါသည်။

(၁) အီစထရိုဂျင်ကုထုံး Oestrogen Therapy

သားမွေးလမ်းကြောင်းအတွင်း ထည့်သွင်းနိုင်သည့် ကွင်းခရိမ်၊ ဆေးလုံးဆေးခဲ၊ ထိုးဆေးစသည်ဖြင့် အီ စထရိုဂျင်ကို နည်းမျိုးစုံဖြင့်သုံးနိုင်သည်။
သားမွေးလမ်းကြောင်း၏ ကျုံ့ညှစ်အားကောင်းစေခြင်း၊ သွေးဝင်စီးဆင်းမှု ကောင်းမွန်လာစေခြင်း၊ သား မွေးလမ်းကြောင်း ခြောက်သွေ့မှုမှ ကင်းဝေးစေခြင်း၊ ဦးနှောက်အပေါ် လုပ်ငန်းမှန်ကန်စေပြီး၊ စိတ်တည်ငြိမ်မှုရ နိုင်ခြင်းစသည့် အကျိုးရလဒ်များ ရရှိနိုင်သည်။

(၂) ပရိုဂျက်စတင်ကုထုံး Progestin Therapy

ပရိုဂျက်စတင်သည် လိင်ဆန္ဒလျော့နည်းစေပြီး သားမွေးလမ်းကြောင်းသို့ သွေးစီးဆင်းမှု လျော့နည်းစေ နိုင်သည်ဟု ဆိုပါသည်။ သို့သော် အီစထရိုဂျင်နှင့် တွဲဖက်ပေးပါက လိင်ဆန္ဒအားကောင်းစေပြီးတက်ကြွမှုလည်း ဖြစ်စေနိုင်ပါသည်။

(၃) အင်ဒရိုဂျင်ကုထုံး Androgen Therapy

အမျိုးသားဟော်မုန်း Androgen (တက်စတိုစတီ Testosterme) ပမာဏ အနည်းငယ်မျှပေးလျှင် လိင် ဆန္ဒအားကောင်းစေသည်ဟု လက်ခံထားကြပါသည်။ ခိုင်မာတိကျသော အထောက်အထားများ မရှိသေးပေ။ ဥရောပနှင့် သြစတြေးလျတို့တွင် အရိုးပွရောဂါအတွက် ကုသရန်အသုံးပြုသောဆေး Tibolone သည်သားမွေး လမ်းကြောင်း ခြောက်သွေ့မှုကို ကာကွယ်နိုင်ခြင်း၊ လိင်ဆန္ဒမြှင့်တင်ပေးခြင်း၊ ဆန္ဒတက်ကြွမှုဖြစ်စေခြင်းတို့ကို ရရှိစေနိုင်သည်ဟု ဆိုပါသည်။ သို့သော် အမေရိကန်ပြည်ထောင်စု၏ အစားအစာနှင့် ဆေးဝါးကွပ်ကဲရေးအဖွဲ့က အတည်ပြုထားခြင်း မရှိသေးပေ။

Author – ဒေါက်တာအေးကျော် (ဇီဝကမ္မဗေဒ)

ဆက်စပ် ဆောင်းပါးများ
OnDoctor App ကိုဒေါင်းလုဒ်ရယူပြီး ဆရာဝန်နှင့် အခမဲ့တိုင်ပင်လိုက်ပါ
Download Now !!!